Id Kahandaman Ku Diya Ina'

Boros tohuri kud Tina tiwanonku, dii tintod dau... 16/5/2010 (daoungadau)

"Iso kounsikahan dahai tangaanak nu, mulong piya dii do oluhoi o tinan nu nga oilaan dahai do ogirot o Kotumbayaan nu doid Kinorohingan Tama ii Gampamasi tokou. Ina, pogiroto' no ginawo om kada poddosi do tumoguang diti tabantalan. Polohoon ngai noh ii kawagatan om koinggoritan diti toruol nu doid dii Yesus.."
Kangku dau.

Kaanu poh iyauh mokinongou om sumimbar do tontok dii. Au oku daa sitongkioyad diya'd tontok dii oi
Ina' tu sipodsinding om sipolombus oku po'd boros ponginsasamod ku diya gisom ko id koruba dii
Yesus.. Nga tinongkiadan ku iya tontok dii mulong piad mohou-lohou ko poh daa.. nga piimanan ku po daad kopiruba toh ii kawagu.. hari tiga dii rumikot. Nga Ina'.. okon nogi do tadau dii kod tuminongkiad dahai om oinsanan do tangaanak nu.

Tihad polombuson ku.. nga ginawo ku oondos sabap id koposion nu nogonop no ii boros do Tuhan id suang do 2 Tim 4:7 Aku telah mengakhiri pertandingan yang baik, aku telah mencapai garis akhir dan aku telah memelihara iman. Ina'.. nourias no dii sulap koposion nu hitid pomogunan nga poingandad no koposion nu dii poingompus hilo id Syurga. Naamot kud poimpasi Ina' om gompion ku ii tanak kolisihan nu Steven Galono om ii monongodu' diya, Larry, Kevin Larson, Leslie, Lionel om ii Ray Lysander..
iti batos ku diya.

Pelayanan Pelepasan

Kopisanangan

Iti no kumoinsan ku'd hiti..

Kounsikahan doid Minamangun
tu kakal po'd minanahak kosiwatan
dit olumis om osimbayan
kumaa tokou toinsanan
do momurimon om tumoguang
ngai'd nipuhawang Dau
naamot tokou po'd poimpasi
hiti'd pomogunan..

Id kosiwatan diti
manganu okud kosiwatan
do mamason do kopisanangan
doid pirumaan diti..
om kogirot daa pogiombolutan tokou
mulong piya doid sambayang noh..
kopogisosokodung tokou daad toilaan
om sunduan ii kaanu'd momosik
pomusarahan om ginawo
montok do koburuon..

.. alansan daa dot
onuan tokou kasari'd kokorisan,
koinsasamadan om kotumbayaan dii
poinggamut id Gampamasi tokou
I Kinorohingan dii Poimpasi om
aiso kahalib do kogoyo'od kuasa
ii momorintah mantad dii laid,
baino om gisom poingompus..

Tu' Iyau no ii sondihon
tu Minamasi do tinan om rusod tokou.

Pounsikou Diya' Tama!!
Id suang do ngaran dii Yesus Kristus.
Gampamasi dahai.. Amen